((حـــنيــن))

الأربعاء نوفمبر 02, 2011 5:03 pm

فاكرك
كأنك لسة قدامى بتحكيلى
عن العمر اللى قضيته على الجبهة
عن الشوق اللى ساكن بين ضلوع صدرك
لحضن الدار
عن الحلم اللى مات مقتول بموت ناصر
وعن ضحكك مع اصحابك
بلون الصبر جوة النار
فاكرك
وبلمح صورتك المرسومة فوق رشح الجدار
اجرى عليها وابتسم
ماتبتسم
ابكى
تئن ف قلبى اوجاعك
هنا
كنت انتظر دخلتك م الباب
كان دايما اجرى عليك واسلم
امسك ايديك الطيبة بايدى
وابوسها
هنا
كنت اجى هربان من ابويا واستجيرك
حتى الوجع
الى ف ملامحك م الحياة
مرسوم قصادى
تنهيدة فيها خشوع مع كل سجدة صلاة
انة الم مع كل تقليبة منام

جدى
يامن زرعنى فى الحياة
يامعنى انى اكون انا
علمتنى
ازاى احب
ازاى احن
وازاى اموت لاجل الوطن
كلمتنى
عن ناصر الفارس
عن مصر خارجة صبية تتمايل
تركب على ضهر الزمن
فاردة دراعها للحياة
عن حلم عاشه الشاب والشايب
لسة فاكر
قعدتك ع الكنبة تقرا ف الجورنال
ولو تعرف
انا لسة بجيب جورنالى كالعادة
وبستناك تقول هاته
وبستنى تمد ايديك على كتفى
تقولى ازاى اكون راجل
واعيش راجل
وتنصحنى ما اكون كداب
انا لسة
براقب دخلتك م الباب
وبمشى لوحدى ف الشارع كما الماضى
لعلك تمشى ويايا لحد البيت
ولو تعرف
انا يمكن بعيد عنك
لكنك لسة جوايا
يشوفك وانت بتصلى
واشوفك ع السرير نايم
وبسمع صوتك المليان بحنية
بجيلك
لو يزيد الحمل فوق كتفى
ابوس ايدك
الم حمولى م الدنيا
وارميها على كتافك

بعافر ف الجميع الاك
واعاند ف التعب وياك
اخاف تنده
ولا اسمعشى
واخاف صوتى يكون عالى
تقوم م النوم
انا لسة بفكر فيك
وقاعد برضة مستنيك
تجينى ف يوم

الأربعاء نوفمبر 02, 2011 5:14 pm

مستواها جاااااااااااااااااااااااامد
احساسها اجمد
تعبيراتها حلوة قووووووووووووووووووووى

الله يرحمه

((حـــنيــن))

((حـــنيــن))

رد: ((حـــنيــن))